Os traballos e os días do Profesor Pensado Tomé. In Memoriam

Resumo

José Luís Pensado Tomé (1924-2000) caracterizou a súa inxente obra filolóxica polo rigor con que a foi elaborando desde diferentes postos docentes no mundo académico español, entre os cales salienta a súa vinculación ás universidades de Madrid, Oviedo e Salamanca, ben como as súas estadías en condicion de Visiting Professor en homólogas institucións de Texas e Wisconsin. Ao longo da súa dilatada produción, Galicia, a súa lingua, a súa historia e as súas xentes representan unha constante dedicación que se explicita en forma de rigorosos estudos, traballos divulgativos ou coidadas edicións de textos. Precisamente, un dos autores a que Pensado consagrou máis tempo foi Fr. Martín Sarmiento, mesmo se podendo afirmar que o bieito se erixiu nunha referencia continua para o ilustre profesor.