A primeira etapa do proceso de depuración de mestres e mestras de primeiro ensino na provincia de Lugo

Agosto-Novembro de 1936*

Resumo

No estudo que se presenta a continuación abordamos a represión da que foron obxecto os mestres e as mestras de primeiro ensino da provincia de Lugo a partir do estoupido da guerra civil, en xullo do 1936. Concretamente, centrámonos na represión levada a cabo por vía administrativa, é dicir, en forma de depuracións laborais. No que atinxe ao marco temporal, focalizamos a nosa atención na primeira fase da depuración, que se estende dende o inicio do conflito bélico até novembro do 1936, momento en que comezan a funcionar as comisións depuradoras. Dende o punto de vista metodolóxico efectuamos unha aproximación cuantitativa, pero tamén unha aproximación cualitativa analizando os aspectos máis significativos que conformaron o proceso. A maiores, incluímos os nomes daquelas mestras e mestres que sufriron esta primeira acometida represora na provincia de Lugo, porque consideramos que os exercicios de memoria complementan a investigación histórica